အမြဲတမ်း ရှိနေတဲ့ အန္တရာယ်
(ဒေါသ ကို နားလည်ပါ စာအုပ်မှ )
နေ့စဉ်ကြုံတွေ့နေရတဲ့ စိတ်တိုစရာ ၊ စိတ်ဆိုးစရာ ၊ ဒေါသဖြစ်စရာ တွေဟာ ကိုယ့်ရဲ့ စိတ်အင်အား နဲ့ စိတ်အခြေအနေ ၊ စိတ်ကြည်လင်ရွှင်လန်းမှု ကို ဖျက်ဆီးနေတဲ့ အရာတွေထဲမှာ အကြီးမားဆုံးဘဲ ။ ဒါကြောင့် နေ့ တိုင်းနေ့တိုင်း ထပ်တလဲလဲ ကြုံတွေ့နေရတဲ့ စိတ်တိုစရာတွေ ကို သတိထားရမယ် ။
ကိုယ့်ငွေတွေနဲ့ အချိန်တွေ အကျိုးမဲ့ လေလွင့်မှု ဖြစ်နေတာ ၊ ကုန်သွားနေတာ ကို ဘယ်သူမဆို နှမြောတတ်ကြတယ် ။ အဲဒီလို ပဲ ကိုယ့်စိတ်အင်အားတွေ ၊ စိတ်ကြည်လင်မှုတွေ ကို မဖြစ်စလောက်ကိစ္စ အသေးအမွှားလေးတွေနဲ့ နေ့စဉ် စိတ်တိုရင်း ကုန်သွားနေတာကို နှမြောတတ်ဖို့ လိုပါတယ် ။
အလုပ်ကို အဆင်ပြေပြေ နဲ့ အောင်အောင်မြင်မြင် လုပ်ချင်တယ် ဆိုရင် အဲဒီလို စိတ်တိုစရာတွေကို ရှောင်လို့ရသလောက်ရှောင်ရမယ် ။ ရှောင်လို့မရတာကိုတော့ သတိလေးနဲ့ စိတ်ကို သိပြီးတော့ ဒေါသကြီးကြီး မပေါက်ကွဲအောင် နေတတ်ရမယ် ။
ဒေါသ ဟာ အမြဲတမ်း ဖြစ်နိုင်တယ် ။ဒေါသ ဟာ ဒုက္ခ လည်းဖြစ်စေတယ် ။ ဒါကြောင့် ဒေါသဟာ အမြဲတမ်း ရှိနေတဲ့ အန္တရာယ် လို့ဆိုနိုင်ပါတယ် ။
ဒီလို အမြဲတမ်းရှိနေတဲ့ အန္တရာယ် နဲ့ ပတ်သက်ပြီးတော့ လေ့လာထားဖို့ ၊ သိထားဖို့ ၊နားလည်ထားဖို့ လိုတယ်။
ကိုယ့်ကို စိတ်တိုအောင် ၊ ဒေါသဖြစ်အောင် ၊ လုပ်နိုင်တဲ့ အရာ၊ လုပ်နိုင်တဲ့သူဟာ ၊ ကိုယ့်အတွက်အန္တရာယ် ဖြစ်တယ် ။ အဲဒီလို အန္တရာယ် မျိုးကလည်း ကိုယ့်ပတ်ဝန်းကျင်မှာအမြဲတမ်း ရှိနေတယ်။ ဟုတ်သလား ၊ မဟုတ်ဘူးလား ၊ ဟုတ်တယ်နော် ။ကိုယ့်ကို စိတ်တိုအောင် ၊ စိတ်ဆိုးအောင် ၊ မခံချင်အောင် ၊ ဆင်းရဲအောင် လုပ်နိုင်တဲ့ ကိစ္စတွေဟာ ကိုယ့်ပတ်ဝန်းကျင်မှာ အမြဲပဲ ရှိနေတယ် ။
ဒီစိတ်တိုစရာတွေဟာ ကိုယ်နဲ့ အမြဲလိုလို ရှိနေတတ်တဲ့အဖော်ပဲ ( အဖော်ကောင်းတော့မဟုတ်ဘူး ) သူတို့ကို ကိုင်တွယ်တတ်အောင် လေ့လာထားရမယ် ။ သူတို့နဲ့ နေတတ်အောင်လည်း လုပ်ထားရမယ် ။ လုံးလုံးကြီး ရှောင်လို့က ဖြစ်နိုင်တာမှမဟုတ်ဘဲ ။
အကယ်၍ ရှောင်နိုင်တယ် ဆိုရင် ရနိုင်သလောက် ရှောင်ပါ ။ ဖယ်ရှားနိုင်ရင် ဖယ်ရှားပါ ၊ ရှောင်လို့မရ ၊ ဖယ်ရှားလို့မရ ရင်တော့ ဘယ်လိုကိုင်တွယ်ဖြေရှင်းရမလဲ ဆိုတဲ့ နည်းလမ်းကို သေသေချာချာ လေ့လာထားရမယ် ။
No comments:
Post a Comment